عجل وتروس
طالع ومش والع وابور الجاز
من تحت ردم المَشْئَمَه طالع
أشبه نهار بتشدّ حِيلُه الشمس
من لمس صاج قلبي ولِع تنّور
فيا الأمل والنور
وفيا احتمال
يقهر جبال تتبدل الأحوال
الجنه تنزل لي وبنات الحور
الطين صبَح بنُّور
وليلي نهار
والراس عمار أفكار
وحلقة زار
منصوبه للعفاريت سليماني
سخَّر ملوك جاني مع العفاريت
الفَعَلَة علُّو البيت وشالو العرش
من تحت مني الفرش كان مبلول
صابح كمان مبلول بعطر الأمل
م المحتمل إني أبات فرحان
سكران بخمر التوهه والسرحان
ضميني أكتر
بدري فيكي اكتمل
م المحتمل أركب حصان رهوان
البرد داخل عضمي من غير باب
والسيف في إيد أحباب
في إيد الوقت
طَلَّعْني بره الوقت كائن بالمجاز
طالع ومش والع وابور الجاز
من تحت ردم المشئمه طالع
الصدر جاش بمشاعر التوهه
ولا جاش ف وقته اللي وعد وماجاش
خلاها خَل نهار ماهوش فايت
إلا على قلبي عجل وتروس
مين اللي سلِّم قلبي للمُحتل ؟
مين اللي أعلنِّي بلد منحوس ؟
خلاها خل استوطنتني الريح
سرِّيح بيسأل عن ملاذ م الشقا
طالع ومش والع وابور الجاز
أعجاز نخيل بالضعف حنَّاها
دمي اللي حنَّى حروفي في الموال
لا شوقي مال صفصافه ع الميه
لا دمعي بلّ عنيّه حنيّه
لا صوتك إنتِ يهزّني دي الوقت
من وقت غاصت ف الشجن خطاويه
قلبي أنا التيه اللي ف الصحرا
صدرك صبح صحرا
وأنا عطشان
عطشان لريّ ضلوعي بالراحه
قلت : السماحه
صِحِيت على زلزله
قلت : الدفا
لغْوَصْت في البركان
عطشان لبَلِّة ريقي من طيبتك
قلبي رمى طوبتك
رمى العنوان
أسأل عليكي القلب مش فاكرك
أسأل عن القلب اللي داب فيكي
إحساسي بيكي اتلبِّشتْ رجليه
إحساسي بيّا نور كفيف امَّحَي
" لا والضحى والليل .. "
خبَّا الرَّحَى
قلبي ما بينهم حَبّ خارج طحين
على فين مودّي الضايع التوهان ؟
آل للسقوط إحساسي بالفرحه
والليل سواد طرحه
شجن مُجتر
ع الأرض خَرّ دماغي مش ساجد
سلِّم لربه الأمر مش مأجور
بالدور يا ناس !
بالدور .. هتتعشو
من لحم راسي اللي اتنقع في الخَلّ
خلاها خل استوطنتني الريح
سرِّيح بيسأل عن ملاذ م الشقا
عجل وتروس
