الهندول
أحقن أمل واشرب خَرُّوب
وارضى بأقل من المطلوب
وأقول يادوب سَنْدَه واخطِّي
لقيتني وانا ماشي موطِّي
لقيتني وانا نايم صاحي
نشوان وحاسس باستِغْنَا
وخدت من مصر استغنا
وخدت ع النوته الطلبات
فيه أربعه واتنين ستَّه
ولِسْتَه مطلوب أأقضيها
أغطس أأقب ارجع بيها
أنا فيها لاخفيها ما تنفعش
الحظّ راح فين ما بيرجعش
وصلت للزمن العابس
المُلْتَبِس فيه معنى الوقت
الخَضْره في إديه عود يابس
وصلت قبل الوقت بوقت
دي الوقت مين مع مين إمتى ؟
ولحد فين مع مين غيرُه
مضطر اقول كتَّر خيرُه
قطر البضاعه اللي نقلني
صحيت على عَقْدِة حاجب
عقدة حطب في الغيط والعه
أطفيها ألقى النار طالعه
تندهني مين ؟ افتح .. حالَه !
يندهني مين عالم مجنون
نولون بضاعة أحزاني
يا نوم يا نوم شفطه من الكاس
يا نوم .. انام ما اصحاش تاني
ما اصحاش ألغْوَص في جناني
صحيت لقيت قلبي بدنجان
وع المرايه الراس طبله
وعيال إدين ع الراس بتدق
وايام بَزُقّ .. ما تتزقش
غريب أنا مين يا مرايتي
أنا اللي فات في الشوك حافي
نجِّدتْ من جلدي لحافي
ومخدِّتي من سهر الليل
أنا الأديب المتبعتر
في قصايد الشعر نزيفي
خريفي قبل الصيف جاني
وجاني يوم ضَمّ الغَلَّه
" ودِّع هُرَيْرَه " ونزل السِّيل
لا الأعشى جاني ولا الجِنِّي
حالجِينِّي .. ولا لُوزه اتْمَزَّتْ
وفي الكتابه الروح نزِّتْ
أتهز .. هزَّاز الهَنْدُولْ
لا انا على طه الجُنْدُول
ولا أبو الطيِّب ضَبَّهْ
ولا خليل حاوي الملموس
أنا مين بدوس على أجداث مين؟
وصلت لمحطة تفاريح
الكل باطل ..
قبض الريح
باطل هنرجع م الأول
اللعب ع القهوه بطلبات
والجَدّ برّاها بطلبات
واللي هنصبح فيه هنبات
خَلِّينا من كل المطلوب
أحقن أمل
واشرب خَرُّوبْ !
أحقن أمل واشرب خَرُّوب
وارضى بأقل من المطلوب
وأقول يادوب سَنْدَه واخطِّي
لقيتني وانا ماشي موطِّي
لقيتني وانا نايم صاحي
نشوان وحاسس باستِغْنَا
وخدت من مصر استغنا
وخدت ع النوته الطلبات
فيه أربعه واتنين ستَّه
ولِسْتَه مطلوب أأقضيها
أغطس أأقب ارجع بيها
أنا فيها لاخفيها ما تنفعش
الحظّ راح فين ما بيرجعش
وصلت للزمن العابس
المُلْتَبِس فيه معنى الوقت
الخَضْره في إديه عود يابس
وصلت قبل الوقت بوقت
دي الوقت مين مع مين إمتى ؟
ولحد فين مع مين غيرُه
مضطر اقول كتَّر خيرُه
قطر البضاعه اللي نقلني
صحيت على عَقْدِة حاجب
عقدة حطب في الغيط والعه
أطفيها ألقى النار طالعه
تندهني مين ؟ افتح .. حالَه !
يندهني مين عالم مجنون
نولون بضاعة أحزاني
يا نوم يا نوم شفطه من الكاس
يا نوم .. انام ما اصحاش تاني
ما اصحاش ألغْوَص في جناني
صحيت لقيت قلبي بدنجان
وع المرايه الراس طبله
وعيال إدين ع الراس بتدق
وايام بَزُقّ .. ما تتزقش
غريب أنا مين يا مرايتي
أنا اللي فات في الشوك حافي
نجِّدتْ من جلدي لحافي
ومخدِّتي من سهر الليل
أنا الأديب المتبعتر
في قصايد الشعر نزيفي
خريفي قبل الصيف جاني
وجاني يوم ضَمّ الغَلَّه
" ودِّع هُرَيْرَه " ونزل السِّيل
لا الأعشى جاني ولا الجِنِّي
حالجِينِّي .. ولا لُوزه اتْمَزَّتْ
وفي الكتابه الروح نزِّتْ
أتهز .. هزَّاز الهَنْدُولْ
لا انا على طه الجُنْدُول
ولا أبو الطيِّب ضَبَّهْ
ولا خليل حاوي الملموس
أنا مين بدوس على أجداث مين؟
وصلت لمحطة تفاريح
الكل باطل ..
قبض الريح
باطل هنرجع م الأول
اللعب ع القهوه بطلبات
والجَدّ برّاها بطلبات
واللي هنصبح فيه هنبات
خَلِّينا من كل المطلوب
أحقن أمل
واشرب خَرُّوبْ !
