**********
**********
مقدمة
**********
**********
كلمة سر
**********
من غيابة بير
**********
لوحدك لإمتى ؟!
**********
بين إديكي
**********
**********
**********
**********
غربله
**********
**********
بعد الفاصل
**********
أربجيه
**********
تجاعيد البال
**********
**********
شجر وولاد
**********
عجل وتروس
**********
5×6
**********
**********
**********
الهندول
**********
الشاعر في سطور
مصباح المهدي .. لغة للأغنياء ولغة للفقراء
أنا معجب بهذا الشاعر، شاعر مغمور بقيمة شاعر مشهور وأكثر ، هو عندي أعلي مقاما من كثيرين يملئون الصحف ويعاملون بترحيب في المنتديات شبه الأدبية يتبادلون النفاق والفجاجة.
أنا معجب بهذا الشاعر رؤية ولغة وحياة خاصة تتجسد في قصائده التي تعج بكل ما أثخنه من جراح التجارب ، وتعاقبات الأيام وعقاباتها.
أحب روحه المرتجفة مما يحدث له ، فهو لا يتلصص علي عنف الواقع من خلف لوح زجاجي وإنما يحتسي مراراته حتى الثمالة.
رؤيته ليست له يد في تشكيلها ، وإنما شكلها الواقع به مزجهما مزجا عبقريا فهو ليس مضطرا إلي القص عن واقع الفقراء وإنما يكفي أن يحكي عن يومه عما يراه رأي العين ويعايشه بالجسد والروح.
إذا ولأنه إنسان مصري بسيط ، البساطه هنا كلمة مبتذلة وعاطلة بكل ما تعنيه البساطة في تمددها من أطراف العوز المرير إلي معاناة جسدية وفكرية تعتصره اعتصارا دون افتعال رقة تهبه قدرة علي تحويل حياته إلي حسبة بسيطة تخترق عمق الإعاقة والتعتيم ، وتنطلق كالشهاب فيجيء شعره علي هذه الصورة.
(مصباح المهدي) إنسان فقير يسعى إلي قوت يومه بإعجاز يورث العجز لكنه لم يرضخ لما قسم له ، ثقف نفسه وخلق ضوءه الصغير السري بعيدا عن الآخرين وراح يحاول إتقان لعبته ، في النهار يسعى إلي المعايش الضئيلة القاسية ، وحين تفتح له أبواب الحياة الحقائق لا يتجاهلها.
أنا معجب بشعر يقوم علي لغتين ، أقصد لهجتين أو خلط قاموس بقاموس وإنما أعني لغة للأغنياء ولغة للفقراء يجسدها التزاحم والإبعاد والنفي وثقل الحذاء علي الرقبة ، ولغة فجة متعالية تكاد لا تري من تتوجه إليه.
(مصباح) شاعر شهم كما هو بطل في حياته بطل في شعره بطولة يعرفها فقراء مصر جميعا ، وجدت أخيرا من لا يخجله البوح بها.
عبد الرحمن الأبنودي
أخبار الأدب 18/10/2009
لو أنني
" لو أنني اقتسمت واللصوصَ هذه الديار
لو أنني استلمت حصتي من بيع ماء الوجه
بالدولار "
كنت اشتريت اللحمة م الجزار
وجبت لك خضار
صابح ، وللعيال
بالمرّة كام غيار
" لكنني يا فتنتي مواطنٌ شريف "
واقع عليه السقف والجدار ....
كلمة سر
ف الزحمة صورتك سور على عنيا
وف قلبي قلب كمان وتنهيده
ف الزحمة صوتك م العطش سكران
سكران طلع بي لسدرة المنتهى
إيه يعني قلبي يصطلي بالنار
يا نار تدخّل عاشق الجنّة
ف الزحمه ساكنه القلب كلمة سر
بتفر بي من قبضة السجان
المستحيل مفروط في حجر الأمل
اللي احتمل
يتحقق المستحيل
مين غيرك إنتي دليل على قدرتي
إني أفوت ف الصخر واتسرسب
من غيابة بير
مش بس صوتك بسمتك كلك
ياللي انت عطر الدنيا من فُلِّكْ
مشتاق أقولك قلبي بعد تاه
ف بحور غريقه ازاي هيوصلك
يا عنيكي كانت أجمل المشاوير
أسبح وفيها اغرق وبيها أطير
أحكي وتسمعني وتحكي لي
واخرج كيوسف من غيابة بير
يا إديكي كانت ماليه قلبي أمان
تقطر حنان يا صدرك البستان
إزاي ألاقي نفسي من بعدك
بعدك أنا إنسان بلا عنوان
مش بس حَبِّك قلبي ، داب فيكي
يحلف ما يكتب شعر غير فيكي
يتنفسك يشرب قوافيكي
أجمل ما تسمع ودن من ألحان
لوحدك لإمتى ؟!
لوحدك لإمتى ؟!
وفيه لسه ف العمر كام إمتى باقي ؟!
زرعت اشتياقي
في أرضي الشراقي
طرح فيا موت
طرح بيت تداعى
عليه الجواعى
تداعت عليهم أمم م الشباعى
لوحدك لآخر محطه ف حياتك
سُكاتك مماتك
مماتك مُقدّر عليك كل ساعه
عليك
لا سلاح جو رادع هجوم
ولا مدفعيات تأمن تخوم
ولا برمائك منع سرب بوم
لوحدك تصوم اللي فاضل ف عمرك
تطفِّل في جمرك
وتنزف أنين
حنين لاستطاعه
وبيت طاعه عابد بلاطه وحيطانه
لوحدك مهاود ملاكه وشيطانه
وسايق جنانه الشعور بالتلاشي
تقول إنت عايش
على الأرض ماشي
على الأرض ماشيه عليك الجموع
لجوع ، محض جوع
جوه منك صحاري
جوه منك شعور بانكسار
له ضوافر
وميت ألف حافر
دماغك مشاع
مشاع لاحتفالات بعيد أو بطوله
مشاع لاختراق هدنة الحرب غوله
مشاع لانتفاع القبايل بدمك
تموت حيّ تتباع قطع للغيار
تموت
"طوبه يعلا بها يا ليل جدار "
لا كان اختيار لك ف لحظة ولاده
ولا اسمك ورسمك وشكل العباده
مقدر ركوب ساده فوق ساده أصغر
ركوبهم جميعاً عبيد كالمطايا
ركوب هم ناقع على الكل زيت
لوحدك لإمتى ؟!
وفيه لسه في العمر كام إمتى باقي ؟!
بين إديكي
امسحي بإديكي جرحي ونضفيه
دخليني ف حضنك اكتر
إنت أكتر حد يقدر ع اللي فيه
مش عفيّه إديا حطي إديكي فيها
انتي فيها الدنيا تحلى
تحلى أكتر لو نفخ روح القُدُس
من روحه فيها
قلبي يشعر بالأمان
ضُمّي قلبي إن خاف كمان
مش غريبه إن انتي
من بين البشر قارياني صح
مش غريبه القلب صح وداس
على أحزانه بيكي
إنت مين باعتك
ف آخر عمري بسمه
اللي فاضل ليا مش أد الأماني
انت عايزه العمر تاني ومن جديد
أستهجّى الحُب حرف بحرف كلمه
أستهجّى الضمه كرمه لخمر تاني
إنت عايزه حد تاني
ما انكتبتش ف قلبه كلمه
آه على النسمه اللي بتشرّبني سرك
اللي بتدوقني خمرك
واللي بتطلّعني .. فوق
يجرى إيه لو عدى بينا العمر فوق
إعدموه
يحكموا بالبراءة الزناه ع اللصوص
البريء اللي شاور عليه الجناه
اللي دمك في كاسه
اختلط بالنبيذ
والعزيز اللي شاور عليه الفقير
الرغيف ف الطابونه
السمك ف الشوادر
لسه قادر تفسّر منام
لأ .. منامشى
الأمل لسه مغشى عليه في المسيره
مش مجرد عسيره الحياه
أو عسير
من هنا لحد آخر عذاب في المسير
الولاد ف الحريقه
الأمل .. الأمان
عندي إيه لك كمان
عندي صوتي ارتعاش
قلبي طالع معاش
وشي ساكن فضيحه
وشي إسود صحيح
بس أبيض صريح
بس واضح وضاءه
من هنا لحد آخر براءه لزناه
اللي فاكره من القصه
عيّل وتاه .....
واشتراه العزيز واللذيذ
و" الحَدُقّة "
لا جل دَقّة على الفول
ودقة ورغيف
إعتراه الشعور إنه عيل ضعيف
فاعتلاه ..التقيل والخفيف والجِبِلّة
بعدها بالأدله الشهود جرموه
يحكموا إن ملعون أبوه مش مُهَذَّب
مش بيشكر ولاة النعم ع العطايا
مش مجهّز مطايا ورُكوبه لأمير
الفقير اللي بالشكل ده تعدموه ..
ركلتين للجزاء
للفريق كارت أحمر
والهدف يبقى دسته
والقرار يبقى لِسْتة قرارات حكيمه
إن فهمي وفهيمه وفهيم يستقيلوا
السيناريو اللي حاطينو بس اللي يطلع
والحوار يلتزم به الجميع لا زياده
ـ إنت يا بني اللي تطلع تقول :
ياعظيمه
ـ انت يا بني اللي تطلع تقول :
جت سليمه
ـ وانت تقعد مكانك مكشّر حزين
لحد امّا نبعت أمين م الأمانه
يفضِّي الخزانه
ويدعو إلي جمع مال الحزانى
ركلتين للجزاء الحكم يحتسبهم
على المطرودين
الكلبش ف إدين
والهدف يبقى دسته
والورق فنّطوه
نفس نفس الورق قبل ما يفنطوه
الولاد .. مش معانا
البنات .. فوق كتافنا
الشيوخ .. ع الدماغ
من هنا لحد آخر جريمه ارتكبها
الفقير وضبوه
نص ما قلتوش
تنساني ف عتمة بير الخوف
وف قبضة إيد التوهه جاروف
وف لمسة خد الدمع جراح
قايم بين آهه وآهه براح
وطريق مقطوع
فيه بيني وبيني السور
وإدين
تقفل في بيبان
ترفع في حيطان
موصوله لحد الروح ما تروح
الضحكه في وشي جدار من طين
وحزين جداً
وبقالي سنين
ما فتحتش باب قلبي لإنسان
لو بان في عنيا الدمع غمام
لو قامت بيني وبيني شروخ
تنشع أمطار
تكبر أشجار التوهه وادوخ
أنا عابر بحر عصى وسبيل
للشُّعرا أنا الزيت ف القنديل
وراميني المشهد برّه السور
كروان مأسور
بالغيط محمي
بحيطان الدور
وانا قلبي إن بات بعد ما ترقيه
إيد جِنّي وتنفد من حواريه
" حواريّ " أنا المتبني الشِّعر
أرجع مفتوح نهب احتمالات
للأسى حكايات
ترانيم وآيات
وأنين مكتوم
معتل أنا الآخر مجزوم
من أول ساعه لآخر يوم
مبدور في رصيف الحزن نزيف
بلدوزر فيَّا شبع تجريف
عراني خريف
ورماني خريف
لا انا حمل سفر ولا حملي خفيف
أنزفني لحد الروح ما تروح
أنزفني لحد ما تبقى النار
دايبه بي ف سطر مالهش قرار
واطلع م الدار
وارجع للدار
نَصّ ما قلتوش
نَصّ لساره .. وياسمين ورتوش
للفتى مختار
جَاي م الجامع
جامع ورق المصحف ف دماغ
وانا خلف فراغ
مأموم ف صلاه من غير تسابيح
مندور للريح
عبله بتكبر والقلب دبيح
تكبر وأنا طالع بالمراجيح
آخر مشوار
هذيان
دقات قلبك مش منتظمه
مش منتظمات
الموت أصبح ضمن الطروحات
بتفكر فيه
الموت في إديه نومه مريحه
موته صريحه
مش موت ساكن معنى حياتك
الموت فاتك
غرقان ف الموت
بتموت مضغوط من غير حيله
شايل شيله
نفَسَك مقطوع
بتموت داخل جوه الموضوع
فوق نقاله
متشال عالة
أو مش مُدْرَج
أو مدرج ف كشوف الموتى
زيك موتى كتير منتظرين
الموت مش بس إدين باردين
الموت دافي بدرجة بركان
عاقل حتى حدود الهذيان
الموت مش بس إدين زرعت
في دروبنا جراح
الموت مش بس جراح سرقت
معنى الأفراح
الموت مش بس براح ضيّق
وشجن سفّاح
الموت صدرك تحت البطاطين
مش متماسك
عامل ماسك نفسه ومفروط
بتموت مضغوط
الموت دقات قلب اتلخبط
بين موت عايشه
وموت مستنيه
غربله
العيال استوطنوا راسك
ضجيجهم
خرَّجك منك مشاع
العيال لاربع عيال والست ماما
وانت في ضِل ابتسامة الهم
فارد لك دراع
انت داخل معركة مانتاش بطلها
انت دوبلير في المشاهد
تنضرب مطرح بطلها
وانت ف الآخر تروَّح
شاري م الأسواق بصلها
مالي كاسك م الدموع
انت بتمثل مشاهد جوع خضوع
مش فرض كلمه
انت بالقسمه اتقسمت اتنين
ما شبَّعتش عيالك
وانت لو طوِّلت بالك
برضه مش ساتر عيالك
عيد ..
تخاف العيد يقرَّب
عيد ..
دا يوم جارح مُجَرّب
مرتين ف العام بطول عمرك وعرضه
وإنت واقع فيه في عرضه ..
يخِف إيد الفقر عن ضَمُّه لضلوعك
إنت خارج من مرايا الفقر
للأحلام مرايا
كهل محتل المشاعر
أو إذا صح انه شاعر
عاصر الصبار حكايا
انت داخل غربله
منك ماهتطلعش حاجه
وانت داخل مرحله
للصبر والعزم الأكيد
مش غريبه
كلها ساعتين ويدَّنْ
والا أقولك قوم وصلِّي
اللي راح يحصل حصل لي
واللي راح يدن إقامه
واللي مُوكَل بالإمامه
واللي راح يرفع جنابَه
زاد على المُحْدِث جنابه
قلبي يا مرمى نيران المدفعيه
بعترت فيّا الديابه
أهدروا دمي الجُناه
مش غريبه الحق تاه
زووم ودندن
مش غريبه القسوة تلبس طقم رِقّه
مش غريبه ان المشقّه
تلقى دَقّه وصحن فول
تلقى عود جرجير في شقّة عيش حكايه
مش غريبه ان الخرابه اللي نازل فيها قبر
مش غريبه القبر أحضان الحبايب
والصحاب
كلهم طالبين رقبتك
مش غريب قدِّمت سبتك
ما التقتش الحدّ جاي
مش غريبه ان قلت جاي
بعد عسر اليسر ماطل
مش غريبه إن الأمل ع القهوه عاطل
دخَّلوه قلب الجريمه
النوايا مش سليمه
والنخيل طارح رصاص
كل خصم زياده منك
للصوص وبشكل خاص
خاص بزياده ف رصيدهم
وانت صيدهم
ف الشبك مانتاش قاصدهم
بس ليهم
خصم منك
غصب عنك ف النهايه
الأمر واقع بيك هترضخ
لو قالو لك : بخ !
تغطس في الهدوم
الكلام مالهوش لزوم
زوم ودندن
قول : آمين
ادخلوا بنا سالمين
ف الحريقه
ضيقه بعد الضيقه زوم
مش غريبه
مش غريبه الكل شاعر
مش غريبه الكل قاص
مش غريبه ف ميكروباص
مجرمين عاملين تناص
ويا صرخة جوع ولادي
الشباعى يئنو باسم الفقرا عادي
الصلاه يؤمُّونا فيها المجرمين ..
ويقولوا : سووا الصف !
عادي
ع المنابر ينصحونا
بتقوى رب الخلق عادي
مش غريبه إن المعادي
تستلم من شبرا كسوه
مش غريبه ان الزكاه ..
من تحت تطلع فوق بقسوه
مش غريبه
مش غريبه انك بتسأل عني ..
قاعد ليه ما بينكم
اعتبرني حَدّ منكم
أي حاجه في أي حته
اعتبرني ف هيصه جِتّه
أو جاكته ببنطلون
أو جاكته بدون مؤاخذه
الحياه دي الوقت آخذه في التعرِّي
مش ها قول : قال المعري
مش ها قول : قال ابن إيه ..
الكلام وقف لجناب السيد الفلته السفيه
الحقيقه الحق متاخد تحري
واللي له حق اشتباه
مش غريبه الكل تاه
كلها ساعتين ويدن....
بعد الفاصل
" بقى مين جارر مين من رجليه
أنا والا البيه ؟!
أنا والا المولوتوف غربلني
أنا والا الجوع اللي هابلني
مدفع رشاش " ؟!
بعد الفاصل
مانتاش من هنا ؟!
احمد ربنا إنك مانتاش
العيشه بلاش انها صعبه
تقسيط أو كاش
شيء فوق الوصف انك تصحى
مانتاش مطَّمن لوجودك
تصلب عودك
تتنيه مَلاوينَه وتتجنِّش
من قبل ما تبدأ بتفنِّش
وتشوف بعيونك وتطنِّش
على دبحك ف الهيكل قُربان
على عزلك قرد ضعيف جربان
برَّه الكردون
تتمنى تفوت على بقَّالك
من غير ماتقوله هايبقالك
قبل سؤالك عن شيء تدِّيه
وتقفِّل على دين متعلَّق
وتقول له يبطل يتقلّق
من طيفك لو عدّا عليه
ما عليك غير إنك تعمل بيه
وتصوم السنه من غير فاصل
بعد الفاصل
على أعصابك تقفل بابك
تضغط تنحلّ
الحل ماجاش مرّه الا عليك
في مرايه حاولت تشوف ماله
وِشّك مومياء
لونك داكن
ساكن مش ساكن
بُرْكاني
فيه رمل ف عينك صدقني
إفتح عنيك
وافرُك بإديك
فيه طحن ف راسك
فيه راسك
فيه برطوشه
فيه حيط .. فيه راس
فيه ماكنة ديزل في ودانك
وف وجدانك
مِيت روح تانيه
ميت روح ساكناك
عيّل جواك مش متهنّي
على بزّ امه
على حضن أبوه
عيّل مندوه لَفّ براسه
مش شايف حد
عيل من أول يوم بقى جاد
حاد وصارم
في مرايه ارجع شوف تقاطيعك
تقاطيع بتموت قبل أوانها
بتموت وتفور فوق بركانها
دمك براكين
على أعصابك تقفل بابك
تضغط تنحلّ
الحل ماجاش مرّه الا عليك
ماعليك غير إنك تعمل بيه
وتصوم السنه من غير فاصل
بعد الفاصل قُفّه بودنين
يشيلوها اتنين
وانت يامسكين تتشال شيله
صارر في الفيل
منديل .. يمكن
أو في المنديل جُثَّه قتيله
الودن ماهيش سامعه سكاتك
دوشته أكتر ..
وكلامه قليل
فيه في المواويل كده عَدّودَه
تركب على أي نشيد أزلي
داعر مخبول
لو بره نقول جوه الملعب
لو مُلْعب تلبس سروالها
وتصلي إمام
وتجيب قدام ورا وتنكِّس
وتصلي بأي كلام فارغ
مش ف التنزيل
فيه لسه دليل
إنك من هنا ؟!
مننا .. ؟!
مانتاش ؟!
إحمد ربنا إنك مانتاش
أربجيه
قلم للكتابه ..
ماهوش أربجيه
ورق ..
مش ذخيره
كتاب ..
مش صحيفه سوابق لمجرم
مسجّل خطر عندكم ليه يابيه ؟
هالوك شعر دقني استفزّ السياده ؟
مجرد كسل مش شروع في الصلاح
ظبطتم سلاح في البطاقه ؟
احرقوها
لمحتم أسى ف العيون ؟
اخزقوها
مسجل خطر
مش عميل للصهاينه
مسجل عشان مش عميل
لأ جديده !!
مسجل عشان ع الحديده ؟
البسوها
مسجل عشان مش بريّل ؟
هاريّل !!
مسجل عشان مالي وشي العجيب
ابتسام مش لعيّل ؟
أقول إيه عشان ترضى عني العصابه
وترضى اللصوص ؟
على بكره حطت إديها العصابه
على يومي شدت رحالها اللصوص
غموس عيش تبخّر
أمل فيا شخّر
عروق دم جفّت
أقول قطر جارّه الحمار الحصاوي
أقول البلاوي
اللي باضت بلاوي بتفقس فساد
أقول الكساد / الغلا
الوحش .. ناهش بطون العباد
أقول إيه ؟
راح امضي
وقول عني إني الترابي بن لادن
وكانز معادن دهب ف الخرابه ..
قلم للكتابه ..
ماهوش أربجيه
تجاعيد البال
لمجرد إنك واقف
حاسبينك حيّْ
لمعان الدمع ف عينك
شايفينه الضيّْ
في كلام أهبل حابسينك
جوه احتياجات
متأجل طرح غيطانك
لليوم الجيّْ
متأجل حكم القاضي
والسيف في ضلوعك ماضي
والوقت عليك مرفوع
م الجوع دبلان
م اللهفه
على إيه مش عارف داير
في ضلوعك مكنك داير
واديك م الخوف محابيس
دا مجرد عيش ف الكيس
مش شايل فخدة ضاني
بتفِتّ العيش في دموعك
وتفِتّ ضلوعك عيله
تعبان م الشيله ولازم
تتشال ع الشيله عيال
ضارب ف الراس زلزال
تجاعيد البال
سال دمك
شايل على همك خيبه
وف قلبك وطن الطيبه
خربش قلبك ناب وحش
يا منجي الجحش الحقني
أنا قلبي استوطن فيه
هكسوس ومغول وأفاعي
لمجرد إنك واعي
باللي بيحصل دُخْت
وف عز شبابك شِخْت
لمِّيت ورقك
لميتني
ورقه ف جيب احتمالات
مشاعر ضد روح إنسان
لا إيد ربتت على كتفك
تقول : مالك ؟!
ولا بسمه
في عتمة حزن تصفى لك
ولا بينك وبين شط الأماني جسور
كيان مكسور
وشوك مبدور
وحافي القلب ع الأسفلت متشظِّي
ومنه اتبعتر البنُّور
15 سنه منفي في وسط الناس
وبين أهلك
دخولك ف الزحام مَهلَك
دخولك شرنقه مهلك
على مهلك
تعبِّي الصمت قنِّينه
وتشربها
وتفتح بابها رحله للسفر هيمان
كأن الجان أعدو لك
سفينة صحرا بيها تعدي
رَبْع الجان
لا راسك م الفزع شابت
ولا قلبك فضل عيّل
15 سنه مضروب عليك السور
وسجَّانك يقوم بالدور
ساعات يمنع مرور أحلام
من الشباك
ساعات يبني مكان شِبّاك
جدار لا قلب فيه ... إسود
ويعرف عشقك الإسود
يرشه بدم طرح سياط
15 سنه تنشاط لتحت وفوق
مافيش ولا سنتي في الجبس
اللي حابسك فيه
نَفَس تاخد براحك فيه
وتتدحرجْ
مسافة دمعتين جوّه
وتتحرك مسافة نظرتين لإديك
وتركب ضهر ريح وتفِلّ
ويظهر غلّ سجَّانك
ويخرج برّه إنسانك
يعبي صدره بالأحلام
15 سنه إعدام
شجر وولاد
لا ها حكيلِك عن الأخضر
شجر وولاد
ولا عن فرحة الأعياد
ولا عن قعده كان شاهد عليها النيل
ولا عن ضحكه فاضت نبع في الصحرا
أنا الدبلان شجر مواويل
أنا الممتده في جراحي جراح الجيل
بودّي اغزلِّك الأخضر
قصايد شعر خالص شال
بودي أرصد الحاصل
ما بين قلبك وبين قلبي
كلام يمكن في يوم يتقال
واترجم لحظه لحظه الصمت إلياذة
وادوّن رفِّة الأهداب
في سيمفونيّه أخَّاذه
بودي اخرج من القمقم
والمّ اللي وقع مني
في لمسة إيدك اتهجّى اللي ما قلتوش
بلاغة صمت
والخَّص من جديد شوقي
بودي آاااه
صلاحية ولد كُنْتُه أنا خِلْصتْ
أقدم لك فروض الطاعه
في محراب جمالك ركعتين إزاي ؟!
أغنيلك كلام يستاهله
مرمر صدرك الرَّيَّان أغاني إزاي ؟!
لا هحكيلك
عن الورد اللي في خدودك
ولا عن هندوان عودك
ولا ع السحر في عنيكي
ولا عن صوتك الألحان
عيونك ربَّما مرَّتْ على اليابس
مدى غرقانه فيه عيني
خدودك ربما صلاها نفس النار
شجن جبار سكن صوتي
وصوتي تحت نِير الأسر
مش قادر يبيّن حرف
وقلبي جوه في ضلوعي
أنا البني آدم الزنزانه
والبني آدم السجَّان
أنا المسروق في أي مكان
" وها أنذا على جبلٍ كما الجودي "
تحت الميه
فوق الميه مش غرقان
ومش مع نوح
ومش قادر أبوح بالجرح
نَزّ قصيده أو صوره
نغم باكي
ومش قادر يكون فاتح
على أحلامي شباكي
أنا اللي فتحت شباكي
على مشهد غرق مكرور
ألفّ وادُور
ومش قادر أكون وياكي ف الجنَّه
ولا في النار
صلاحيِّة ولد كُنْتُه أنا خلصت ..
وبينّا بيبعد المشوار
عجل وتروس
طالع ومش والع وابور الجاز
من تحت ردم المَشْئَمَه طالع
أشبه نهار بتشدّ حِيلُه الشمس
من لمس صاج قلبي ولِع تنّور
فيا الأمل والنور
وفيا احتمال
يقهر جبال تتبدل الأحوال
الجنه تنزل لي وبنات الحور
الطين صبَح بنُّور
وليلي نهار
والراس عمار أفكار
وحلقة زار
منصوبه للعفاريت سليماني
سخَّر ملوك جاني مع العفاريت
الفَعَلَة علُّو البيت وشالو العرش
من تحت مني الفرش كان مبلول
صابح كمان مبلول بعطر الأمل
م المحتمل إني أبات فرحان
سكران بخمر التوهه والسرحان
ضميني أكتر
بدري فيكي اكتمل
م المحتمل أركب حصان رهوان
البرد داخل عضمي من غير باب
والسيف في إيد أحباب
في إيد الوقت
طَلَّعْني بره الوقت كائن بالمجاز
طالع ومش والع وابور الجاز
من تحت ردم المشئمه طالع
الصدر جاش بمشاعر التوهه
ولا جاش ف وقته اللي وعد وماجاش
خلاها خَل نهار ماهوش فايت
إلا على قلبي عجل وتروس
مين اللي سلِّم قلبي للمُحتل ؟
مين اللي أعلنِّي بلد منحوس ؟
خلاها خل استوطنتني الريح
سرِّيح بيسأل عن ملاذ م الشقا
طالع ومش والع وابور الجاز
أعجاز نخيل بالضعف حنَّاها
دمي اللي حنَّى حروفي في الموال
لا شوقي مال صفصافه ع الميه
لا دمعي بلّ عنيّه حنيّه
لا صوتك إنتِ يهزّني دي الوقت
من وقت غاصت ف الشجن خطاويه
قلبي أنا التيه اللي ف الصحرا
صدرك صبح صحرا
وأنا عطشان
عطشان لريّ ضلوعي بالراحه
قلت : السماحه
صِحِيت على زلزله
قلت : الدفا
لغْوَصْت في البركان
عطشان لبَلِّة ريقي من طيبتك
قلبي رمى طوبتك
رمى العنوان
أسأل عليكي القلب مش فاكرك
أسأل عن القلب اللي داب فيكي
إحساسي بيكي اتلبِّشتْ رجليه
إحساسي بيّا نور كفيف امَّحَي
" لا والضحى والليل .. "
خبَّا الرَّحَى
قلبي ما بينهم حَبّ خارج طحين
على فين مودّي الضايع التوهان ؟
آل للسقوط إحساسي بالفرحه
والليل سواد طرحه
شجن مُجتر
ع الأرض خَرّ دماغي مش ساجد
سلِّم لربه الأمر مش مأجور
بالدور يا ناس !
بالدور .. هتتعشو
من لحم راسي اللي اتنقع في الخَلّ
خلاها خل استوطنتني الريح
سرِّيح بيسأل عن ملاذ م الشقا
5×6
على أي جنب يطقطق الشُّكْمان
واللوحة 5×6 مش ألوان
مَدّ البصر أبواب بتتقفِّل
وأنا جنب شيشه ف ركن م الأركان
لو قهوه ساده
القهوه ساده الشاي
ومحطتي الجايّه
وقطري الجاي
طب تيجي ازاي
أكيد مش جاي
واحد من الاتنين :
أنا .. يا القَطْر
تصطاد دماغي بنِبْلَه في المولد
وكإني واقف وحدي فوق السطوح
وتجيبني لمس كتاف
وانا مدبوح
مَدّ البصر مفتوح عليا الهاويس
وأنا جنب شيشه ف ركن م الأركان
على أي جنب يطقطق الشُّكْمان
الرَّسْمه ..
نفس الرسمه في الألبوم
متكرره تكرار ساعات اليوم
مأزوم .. مُشَوَّه
ربما ومأموم
بإمام ماهوش معلوم من الشياطين
الصوره 5x 6 بهتانه
تعدلها تقلب راسها سكرانه
كان السؤال : إزاي ؟
جاوبت : منين
غاز الأسى طالع كأنه الغاز
من أي ناحيه اتظبَّطتْ ألغاز
من أي ضلفه في باب جحيم سَرْسِبِتْ
نار الجحيم تقصدني انا بالذات
ما كُنت صاحب كِيف ولا لذَّات
غير انِّي مدمن تُوهَه جُوَّايا
شارب أسايا نوع من الفودكا
فارد له بعد المتن رسمايه
لِمِّي بإيدك شَعْث هذا الجبين
واستحمليه مسكين وعدِّى به
البحر ماتبلهش خايف يفوق
تفتح شقوق جواه من الهذيان
إيدك على هذا الدماغ لمِّيه
على صدرك إنت
وسلسلي العفاريت
تسابيح جريح
(1)
وَهْم ..
انتَ سمِّيته التزامْ !
وبموجب الكلمه انتهيتْ
صليت صلاتك
واستخرت الله تموت
الخوف تابوت
والإشتياق للمستحيل مدقوق تابوت
والقوت إلـه المعدمين
ضاغط مشاعرك
فَرَّغك من محتواك
دمك بينبض فيك هلاك
أعصابك النار والحطب
شابب حريق
ريقك نَفَس نَفْس الحريق
الحب يااااه ..
القلب يااااه ..
فاكر تفاصيل ضِلَّها
فاضل من المُولد ضلال
كده أكدوا حق احتلالك بالعيال
بفاتورة الفواتير نسَبهم
" لاسم النبي حارسه " الشهيد
" الليله عيد "
جهز ضلوعك لانقضاض العيد عليك
تطلع على اكتافك عيال
للسطح سطحك مش بعيد
تكسر دماغك يا عنيد
وتطوِّل البال في احتمال
إنك تعيد الجمله
والمُخْرج بعيد
الليله تخرج من هدومك
حاجّ بُوذي بدون إزار
تمشي برجليك ع الجدار
وتنفِّد النار بين صوابعك باقتدار
الليله عيد
اتحرَّكت في عنيك
" دموعك من سنه " وسنتين
سنين
نفس الصلاه
نفس الأنين
نفس الإدين
نفس العنين ..
نفس احتجازك مطرحك
محتل متحاصر رهين
(2)
م الصبح خايف
يطلع الصبح يلاقيني
نُصّين :
معايا باحسّ به
والتاني متساب ع السرير
الدم مش واصل صوابعي العشره فوق
الدم مش واصل صوابعي العشره تحت
فيه فَحْتْ
فيه بير
فيه أسى
فيه وِحْدَه ف الليل وارتعاش
فيه موت مُعَاش
فيه ضحك ما بقاش ضحك فيه
تنهيد يجيب الصخر بالواد
واد صِحى
لقى نفسه شيخ
لقى نفسه ممسوخ مومياوات
يا بكره متأجِّل أنا :
مربوط ف دوَّار التزامْ
الصمت إعدام للكلام
والموت خَرَس
والحلم في القمقم فرس
مربوط معايا في ساقية الواجب يكون
مطلوب أكون
واجب أكون
واجب أعلق فوق شفايفي الإبتسام
مهما يكون
واجب أأدّي الفرض مهما يكون
جنون
الرحله سِلّم للفراغ
تفريغ هوا
تفريغ دماغ
تسليم بأمر الواقع المجنون
جنون
(3)
أشتال قلم
واشتال قَدُوم
واشتال من البِرَك الهموم
أستأذنِك لما آجي أنام
واستأذنِك لما آجي أقوم
ولزوم حاجات مالهاش لزوم
أسجد في غير وقت الصلا
وأصوم
وليل كامل أقوم
دمي اللي خارج م الهدوم
مفروط
نجوم الضهر تطلع لي النجوم
في مكاني مطرح ما انطرحت
أطرح شجر دُوم في الخلا
واطرح كروم
واستأذنِك لما آجي أفتح بُقِّى
وارضع م الغيوم
واستأذنِك لما آجي ألوم
نفسي على التقصير
والمّ الشوك لَمُوم
أستغفر السجان وأسبّح كل يوم
أشتال قلم
واشتال قدوم
واشتال من البِرَك الهموم
(4)
القطر فات
ع الخد فات
ع الركبتين
قطَّع إدين
رجلين وعلَّق ع الصليب
هذا المطيع المستجيب
للضرب ف اتنين واربعه
غمضت عيني
لقيتني ناتج قسمتي على أربعه
هيكل سعى
وسط الزحام
كهل ادَّعى
" ما ليس فيه "
نُصّي اللي كان عاقل دخل
فيه السفيه
والقطر فات
ومشيت على القضبان
أجرجر في العجل
وأجرجر الخوف والسكات
أسميكم
أَسَمِّيكُمْ
أسَمِّي كل شيء باسمه
أسميكم واسمي الجرح
والنيل اللي مش حابب
يضلِّل فوقي صفصافُه
وانا شايلُه في تكويني
وعندي كل أوصافه
أنا اللي ابني خَلَط دمّه
على الجبهه بدم حسين
أنا الدم اللي في فلسطين
بيحرس مدنة الأقصى
وبيت لحم ..
ورفح ..
وجنين
وجدي كان مع الناصر صلاح الدين
وفي الأزهر
رفع أعلى أدان جدي
أدان ثورة تسعتاشر
أسميكم !
أسامي ولادي دابت في أساميكم
إذا اشتعلت حروب ع الشط
داب الكل في الواحد
أدوب فيكم
وتنسوني كَيَان منبوذ
إذا ارتفعت رايات النصر
قلتم : بدر والأحزاب !
وكترت فيكم الأحزاب
وانا حزبي الوطن
نخلَه بشط النيل
أنا الناي اللي في المواويل
أنا الزيت اللي في القناديل
أنا الآهه اللي في الغنوه
وانا عِنْوه اتّاخرت بعيد
عن المشهد
وانا باشهد
بأني متن في المشهد
ما نيش هامش
أسميكم !
وأنا قلبي ملان أشجان
روى دمي الغيطان راضي
عرق ودموع
وروَّي سحابي ..
في الأرض الحبيبه ربوع
وافوت وحدي
أعدي الشارع الصاخب
أداري الوَشْم ع المِعْصَمْ
أداري الرب جوّه ضلوع
واشدّ قلوع
على شط الأمان بيتي
أسميكم
أسميني ببيان جنسيه مصريه
وخانة ديني مش م السِّيخ
وابويا الأبّ في الإنجيل
وفي القرآن أبويا الشيخ
أسميكم !
أسمّي غربتي غربه
أسمّي وحدتي كربه
واسمّي الباب معلَّقني وحيد السور
أسمّي الحلم تصبيره
وأسمّي الجيره برّه السور
كتار .. والآخر المأسور
أنا العصفور
أسميني جناح مكسور
أسميني وطن أتمشى سِرّاً فيه
كأن الإذن بالتجوال
صَدَر مشروط
صَدَر مربوط
بخانة ديني في بطاقه
كأن العشق عطّل طاقه مشتاقه
عن الأشواق
لحد ما تثبت الأوراق
خِلِو اتنين من الفيرس
أسميني إذا ألقي السلام عابر
فتى عابر إلى المجهول
واعلق نفسي ع الحيطه
صليب يشهد على الغُربه
واسمّي الاغتراب تُربَه
وحضنك يا وطن أكفان
أسميكم
واسمّي بناتي :
مريم .. نور
سعاد .. زينب ..
خديجه .. بدور
واقوم اتوضّى وياكم
وأتعمِّد
وينزل برضه نفس السور
وانا نفس النسيج فرحان
بعيد الفطر والأضحى
ولو يصحى الوطن باصحى
ولو تنزل ستاير ليل
باغنِّي ليل يا عين موال
وادوَّر إيد بإيد ..
عن شمسه لو غابت
واسمّيني .. واسمِّيكم
عيال تلعب
وناس شابتْ
وناس في الأرض دي دابتْ
صليب ..
وهلال
أسميني
واسميكم